Personvernerklæringa til Utlendingsdirektoratet (UDI)
Når vi «behandlar personopplysningar», vil det til dømes seie at vi samlar inn opplysningane, registrerer dei, set dei saman, lagrar dei eller leverer dei ut.
UDI skal behandle personopplysningane dine på ein lovleg og sikker måte. På denne sida kan du lese om korleis vi behandlar personopplysningane dine, og kva rettar du som er registrert i systema våre, har.
-
1. Kvifor behandlar vi personopplysningane dine?
UDI hentar inn og brukar personopplysningar for å
- behandle saker om visum, opphaldsløyve, vern, eksklusjon, reisedokument, statsborgarskap, bortvising, utvising og assistert retur
- kontrollere og verifisere opplysningar, til dømes avklare identiteten, alderen og familierelasjonane til ein person
- kalle tilbake løyve, til dømes opphaldsløyve eller visum
- gi asylsøkjarar tilbod om ein stad å bu og gi økonomisk støtte til personar som bur i asylmottak
- utøve omsorgsansvar for einslege, mindreårige asylsøkjarar mellom 15 og 18 år
- leggje til rette for personar med oppfølgingsbehov på asylmottaket der dei bur, og når saka deira blir behandla
- rapportere om saksbehandlinga vår, til dømes til regjeringa og departementa
Vi kan vanlegvis berre bruke opplysningane dine til dei oppgåvene vi har henta dei inn til. UDI har samtidig ei plikt til å kontrollere og verifisere opplysningar vi får i utlendings- og statsborgarsaker. Det vil seie at vi kan bruke opplysningar frå dei tidlegare utlendingssakene dine når vi behandlar ei ny sak. Vi kan også bruke opplysningar frå saka til ein annan person dersom det er nødvendig for å behandle saka di.
-
2. Kva er det rettslege grunnlaget for behandlinga av personopplysningane dine?
Når vi behandlar personopplysningar i utlendingsforvaltninga, skjer det innanfor rammene av utlendingslova, statsborgerlova og forskriftene som høyrer til. UDI har egne heimlar for å behandle personopplysningar i blant anna utlendingslovas § 83a og statsborgerlova § 29a. UDI kan derfor behandle personopplysninger som er naudsynte for å utføre oppgåvene nemde i punkt 1.
-
3. Kvar hentar vi opplysningane frå?
UDI hentar inn nødvendig informasjon frå deg som søkjer om opphaldsløyve eller har ei anna sak til behandling. Du skal bidra til å avklare identiteten din og har plikt til å gi opplysningar som kan ha noko å seie for saka di (sjå utlendingslova § 83 og statsborgerlova § 29).
Dersom det er nødvendig, kan UDI også hente inn opplysningar frå andre offentlege etatar, til dømes skatteetaten, Nav, Lånekassen, folkeregisteret, barnevernet eller politiet (sjå utlendingslova § 84 og utlendingsforskrifta §§ 17-7d til 17-7j, samt utlendingslova § 29b og statsborgerforskrifta §§ 14-1 til 14-8). Vi kan også hente inn opplysningar frå offentleg tilgjengelege kjelder, slik som nettsider og sosiale medium.
-
4. Kva for personopplysningar behandlar vi?
UDI behandlar personopplysningar som er nødvendige for å utføre oppgåvene som er nemnde i punkt 1. Kva for konkrete personopplysningar vi behandlar om deg, er avhengig av oppgåva vi skal løyse. Du vil få nærare informasjon om dette under saksbehandlinga.
Nokre opplysningar vil UDI behandle uavhengig av sakstype, til dømes opplysningar om
- identitet (til dømes namn, fødselsdato, fødestad, kjønn, statsborgarskap, passnummer)
- biometri (ansiktsfoto og fingeravtrykk)
- opphaldsstad og kontaktinformasjon (til dømes postadresse, bustadadresse, e-postadresse og telefonnummer)
- relasjonar til andre (til dømes familie, vertsfamilie, arbeidsgivar, studiestad)
- økonomiske forhold (til dømes inntekt, økonomisk støtte frå det offentlege, formue)
- utlendingssaka (til dømes status i saka, informasjon om kva som har skjedd i saka, og grunnen til at du får opphaldsløyve)
-
5. Kvar registrerer vi personopplysningane dine?
UDI registrerer personopplysningane dine i ulike register som vi har ansvar for:
- Utlendingsdatabasen (UDB) er det sentrale personregisteret til utlendingsstyresmaktene. Alle opplysningane i utlendings- og statsborgarsaker blir registrerte og lagra i UDB. Utanlandske statsborgarar som blir registrerte, får tildelt eit unikt identifikasjonsnummer (DUF-nummer). Det finst også norske borgarar som er registrerte i UDB, til dømes familiemedlemmer, vertsfamiliar og arbeidsgivarar.
- Utlendingsregisteret er eit biometriregister som inneheld fingeravtrykk og ansiktsfoto av personar frå land utanfor EU og EØS-området (sjå utlendingslova § 100).
Enkelte opplysningar registrerer vi også i europeiske informasjonssystem:
- EURODAC er eit biometriregister som inneheld fingeravtrykk og identitetsopplysningar om personar frå land utanfor EU og EØS-området som søkjer vern eller kryssar grensene ulovleg.
- Visa Information System (VIS) er eit informasjonssystem som inneheld personopplysningar, ansiktsfoto og fingeravtrykk til personar frå land utanfor EU og EØS-området som søkjer om besøksvisum.
- Schengen Information System (SIS) er eit informasjonssystem som inneheld opplysningar om personar som ikkje har rett til å reise inn i og opphalde seg i EU og EØS-området, eller som er ettersøkte i samband med straffbare handlingar. Kripos har ansvaret for den norske delen av SIS.
-
6. Når kan vi avgjere ei sak automatisert?
UDI kan avgjere saker automatisk (automatisert behandling). Det betyr at vi avgjer saka utan at nokon saksbehandlar vurderer opplysningane i saka manuelt. Sakene som UDI behandlar automatisert vil alltid bli behandla ut frå regelverket som gjeld og dei personopplysningane vi har om deg.
Vi kan berre behandla saka automatisert når det er klare vilkår i regelverket for om det du har søkt om skal løyvast eller avslåast. Viss vi må vurdere skjønnsmessige vilkår i regelverket, kan vi ikkje avgjera saka med automatisert behandling. Viss du klagar på eit vedtak som UDI har gjort med automatisert behandling, har du krav på at vi behandlar klaga manuelt.
-
7. Kven har tilgang til personopplysningane dine?
Utlendingsstyresmaktene i Noreg omfattar fleire etatar som har ulike oppgåver. Utanriksstasjonane og utlendingsseksjonane i politidistrikta tek imot og førebur til dømes søknader om opphaldsløyve, medan Politiets utlendingseining (PU) tek imot og registrerer søknader om vern. UDI avgjer mellom anna søknader om vern, opphaldsløyve og norsk statsborgarskap. Utlendingsnemnda (UNE) behandlar klager på vedtak frå UDI.
Dei tilsette hos utlendingsstyresmaktene brukar ulike saksbehandlingssystem, og gjennom desse systema får dei tilgang til opplysningane som er registrerte om deg i registera våre. Dei tilsette skal berre behandle personopplysningane dine når det er nødvendig for arbeidsoppgåvene deira.
-
8. Korleis tek vi vare på personopplysningane dine?
Vi vernar opplysningane i registera på ulike måtar, til dømes gjennom brannmurar og ved å kontrollere kven som har tilgang til bygningane våre. Det er berre godkjende personar som kan få tilgang til personopplysningane dine, og vi kontrollerer korleis dei behandlar personopplysningar i datasystema.
-
9. Kven leverer vi personopplysningane dine ut til?
UDI har teieplikt og kan berre levere ut personopplysningane dine dersom det står i lova at vi kan gjere det, eller dersom du samtykkjer til det.
Fleire offentlege etatar har lov til å hente inn opplysningar frå UDI – til dømes skatteetaten, Nav, Lånekassen, folkeregisteret og politiet. Vi har også ei plikt til å levere ut opplysningar til andre land i Europa som samarbeider om kontroll av landegrensene, visumreglar, politioppgåver og behandlinga av søknader om vern (land som er med i Schengen- og Dublin-samarbeidet).Vi leverer i tillegg ut enkelte opplysningar til internasjonale organisasjonar og interesseorganisasjonar som hjelper oss i utlendingssaker, slik som Norsk organisasjon for asylsøkere (NOAS) og International Organization for Migration (IOM). Bedrifter og personar som utfører oppgåver for UDI, kan også få tilgang til opplysningar som er nødvendige for arbeidet deira. Dette kan til dømes gjelde driftsoperatørar av asylmottak.
UDI kan også gi opplysningar som ikkje ligg under teieplikt, til andre offentlege etatar og til bedrifter og personar. Til dømes gir vi informasjon til Arbeidstilsynet og arbeidsgivarar om ein person har lov til å arbeide i Noreg eller ikkje.
-
10. Kor lenge lagrar vi personopplysningane dine?
UDI vil lagre personopplysningane dine så lenge dei er nødvendige for å løyse oppgåvene i punkt 1. Etter det kan personopplysningane dine bli overførte til Riksarkivet (sjå arkivlova).
-
11. Kven er behandlingsansvarleg?
UDI er behandlingsansvarleg. Det vil seie at vi har ansvar for korleis personopplysningane dine blir behandla i UDI og på asylmottak i samband med oppgåvene som er nemnde i punkt 1. Vi har også ansvar for personregistera UDB, utlendingsregisteret og dei nasjonale delane av EURODAC og VIS.
-
12. Kva rettar har du? (Innsyn, retting, sletting og klage)
Dersom du er registrert i registera til utlendingsstyresmaktene, har du desse rettane etter personopplysningslova:
Innsyn
Du har rett til å få informasjon om
- kva for konkrete personopplysningar vi behandlar om deg
- kvar dei aktuelle opplysningane er henta frå
- kva føremål dei blir brukte til
- om vi har gitt dei vidare til nokon andre, og kven vi har gitt dei vidare til
Fyll inn innsynskjemaet vårt for å be om innsyn.
Retting av feil
Dersom du oppdagar at UDI har registrert urette, utdaterte eller ufullstendige opplysningar om deg, har du rett til å få desse retta eller oppdatert.
Høve til å klage
Dersom du meiner at UDI ikkje behandlar personopplysningane på den måten regelverket krev, kan du klage til Datatilsynet i Noreg. Informasjon om korleis du bør gå fram, finn du på nettsidene til Datatilsynet (ekstern nettstad).
Sletting av personopplysningar
Personopplysningar som er lagra i Utlendingsdatabasen er naudsynte for at UDI kan gjere sine oppgåver, for vitskapeleg og historisk forskning, for statistiske føremål og for arkivføremål, og du vil som hovudregel ikkje ha rett til å få sletta desse, jf. personvernforordninga artikkel 17 nr.3.
-
13. Når utleverer vi opplysningar til forsking?
UDI kan i nokre tilfelle utlevere opplysningar frå enkeltsaker til forsking. Personopplysningane skal bli anonymiserte før dei blir utleverte til forskarane. Dersom forskinga ikkje kan bli gjennomført utan opplysningar som identifiserer enkeltpersonar kan UDI, etter ei konkret vurdering, utlevera personidentifiserande opplysningar.
