• Dersom du får besøksvisum, får du beskjed av ambassaden.
• Sjølve visumet er ein etikett som blir limt inn i passet ditt.
• Ambassaden fortel deg kva du skal gjere for å få visumet. Vanlegvis kan du få det der du leverte søknaden, men enkelte gonger må passet ditt sendast til ein norsk ambassade. 

I visumet står det

• kor mange dagar du kan vere i Noreg eller andre Schengenland til saman (4). Hugs at både dagen du reiser inn, og dagen du reiser ut, tel med 
• den tidlegaste datoen du kan reise inn i Noreg eller andre Schengenland (2), og når du seinast må forlate Noreg eller Schengen (3). NB! Du kan ikkje vere i Noreg eller Schengen i heile denne perioden, berre så mange dagar som visumet ditt er gyldig for (4)
• om du kan besøkje alle Schengenlanda eller berre nokre av dei, for eksempel berre Noreg (1)
• kor mange gonger du kan reise inn og ut av Schengenområdet (ein gong, to gonger eller mange gonger) (6)
• namnet ditt (7) og passnummeret ditt (5)
• merknader(8) er oppgitt i kodar, sjå kva kodane betyr lenger nede på sida

Sjekk at denne informasjonen er riktig.

NB! Det kan hende at du har fått visum for færre dagar eller færre innreiser enn det du søkte om. Dersom du meiner at dette kjem av ein feil eller ei misforståing, må du ta kontakt med ambassaden. Dersom du er ueinig i avgjerda, kan du klage til ambassaden.

Merknad på visumetiketten

Merknader (8) blir gitt opp som kodar og betyr følgjande:

NO 1: Visumet er utskrive i samsvar med Approved Destination Status for Kina (avtale mellom kinesiske styresmakter og andre land som tillèt organiserte gruppereiser).

NO 2: Unntatt frå kravet til reiseforsikring.

NO 3: Brukt i kombinasjon med R/DK (representasjon Danmark), når visumet òg er gyldig for Færøyane.

NO 4: Brukt i kombinasjon med R/DK (representasjon Danmark), når visumet òg er gyldig for Grønland.

NO 5 Brukte i kombinasjon med R/DK (representasjon Danmark), når visumet òg er gyldig for Færøyane og Grønland.

NO 6: Søkaren har fått innvilga visum sjølv om reisedokumentet ikkje er gyldig minst tre månader etter siste gyldighetsdag i visumet, i samsvar med utlendingsforskriften § 3-9 anna ledd.

• Når du skal reise inn i Noreg, viser du fram passet ditt med visumetiketten.
• I tillegg må du kunne vise dokumentasjon på at du har nok pengar til opphaldet, for eksempel kontantar eller kredittkort. Dersom du har ei garantierklæring, må du ta med kopi av garantierklæringen.
• Politiet kan også be deg om å gi fingeravtrykk, som politiet samanliknar med fingeravtrykka du gav da du søkte om visum. 
• Så lenge visumet er gyldig, kan du reise fritt rundt i Schengen eller i dei landa visumet ditt gjeld for.
• Dersom du reiser ut av Schengen, for eksempel til Storbritannia, kan du ikkje reise inn i Schengen igjen. Da må du ha visum for fleire innreiser eller søkje om eit nytt visum. 

Dersom du har fått eit besøksvisum som berre er gyldig i Noreg, vil det stå i visumet ditt. Dette kallar vi eit nasjonalt visum. Grunnen til at du har fått eit nasjonalt visum, er at du har ein viktig grunn til å besøkje Noreg, men ikkje fyller alle krava til å få eit visum som gjeld i heile Schengenområdet.

Dersom du har fått eit nasjonalt visum, må du merke deg dette:

• Du må reise direkte inn og ut av Noreg. Du kan for eksempel ikkje mellomlande i eit anna Schengenland eller reise med bil gjennom andre Schengenland på veg til Noreg.
• Du kan ikkje besøkje andre Schengenland medan du er i Noreg.
• Dersom du reiser ut av Noreg, kan du ikkje komme tilbake før du har fått nytt besøksvisum.

Det er viktig at du ikkje er i Noreg eller andre Schengenland fleire dagar enn det som står i visumet ditt. Dersom du blir i Schengenområdet for lenge,

• risikerer du at du ikkje får besøksvisum neste gong du søkjer
• risikerer du at andre i familien din ikkje får besøksvisum når dei søkjer
• kan du bli bortvist frå Noreg av politiet 
• kan du bli utvist frå Noreg og få eit innreiseforbod. Det inneber at du ikkje kan få visum til Schengenområdet i ein periode på for eksempel to eller fem år.