Publisert: 11.03.2022

Avgjerda om å gi mellombels kollektiv beskyttelse inneber at det er gjort ei vurdering av at ukrainarar som har flykta frå krigen, har behov for vern. Dermed treng ikkje søknadene å behandlast individuelt. Det same gjeld personar som har fått beskyttelse i Ukraina, og nære familiemedlemmer med eit anna statsborgarskap. EU vedtok å gi mellombels kollektiv beskyttelse tidlegare i månaden.

Ordninga med mellombels kollektiv beskyttelse er brukt to gonger tidlegare. Første gong i samband med konfliktane i Bosnia, og seinare under krigen i Kosovo

For ukrainske asylsøkjarar betyr dette at dei slepper ei tidkrevjande individuell behandling. Dermed går det raskare å få søknaden behandla, og det vil ta kortare tid frå dei kjem og til dei kan busetjast i ein norsk kommune. UDI må likevel fastslå identiteten før vi kan gi eit opphaldsløyve.

Ukrainarar som kjem til Noreg no, kan i første omgang få beskyttelse i eit år. Løyvet dannar ikkje grunnlag for permanent opphaldsløyve, men kan forlengjast i inntil tre år. Etter tre år kan dei få eit nytt mellombels løyve som dannar grunnlag for eit permanent opphaldsløyve. Løyvet gir rettar til helse, arbeid og skule.